Mapalpalagipan dagiti mannalon a no adda ti sobra wenno saan a magatang a nateng dagitoy ket ipakaamoda kadagiti local government units wenno iti provincial government ti Benguet tapno masolusyonan ti nasao a banag.
Iti panakiuman ti Bombo Radyo kenni Mayor Romeo Salda ti La Trinidad, Benguet, kinunana a silulukat ti municipal office para iti panangipaayda iti tulong, ti panangkitada iti remedio no kasano a mailako dagiti nateng dagiti mannalon.
Sigun kenni Salda, dagiti tulong nga ipapaayda kadagiti mannalon no saan a magatang ti natengda ket ti pananggatangda ken panangipaayda iti pang-krudo dagiti mannalon nga agsubli iti probinsya dagitoy.
Kinuna ni Salda a dagiti nateng dagiti mannalon ket maipapaay kas relief no mamingsan tapno agnumar dagiti daduma a tao ken saan laeng a masayang a maibelleng.
Nupay kasta, agbalbalin a pakaseknan iti municipal office ti La Trinidad no kasano nga imanehar dagiti private trading areas gapu ta awan ti kontrolda iti nasao a banag.
Gapu iti dayta, makidkiddaw ti koordinasyon dagiti private trading areas para iti panangkita nga awan ti nateng a maibel-belleng laeng.
