Maiyunay-unay kadagiti nagannak a sukimatenda a naimbag ti product composition dagiti gatangenda nga school supplies ita nga umadani manen ti panaglukat iti baro nga school year.
Daytoy ket tapno maliklikan ti panaka-expose dagiti estudyante kadagiti kemikal a narisgu iti salun-at.
Iti panakaiuman iti Bombo Radyo kenni Thony Dizon, campaign officer iti organisasyon a Ban Toxics, imbinglayna a nakaipaay dagitoyen iti palagip kadagiti aglaklako iti school supplies idiay Manila idi napan a lawas seknan kadagiti produkto nga addaan kadagiti toxic a ramen.
Sigun kenni Dizon,kadawyan kadagiti produkto nga addaan iti nasao a komposisyon partikular ti Lead dagiti bag ken dagiti water containers maibasar iti bukodda a panagsukimat.
Innayon ni Dizon a maysa kadagiti karit ket ti panangibasar dagiti gumatang iti presyo dagiti produkto a makaituntunda iti dakdakkel a posibilidad a saandan a sukimaten dagiti naramat kadagiti produkto.
Gapu iti dayta, makidkiddaw metlaeng kadagiti maseknan nga opisina ti panangipatungpalda iti inspeksyon ken mangipaiyulogda iti naan-anay a pagalagadan tapno masigurado a dagiti mailako iti merkado ket natalged nga aramaten nangruna dagiti ubbing.//Bombo Rob Dominguez
