Maur-uray pailaeng ti resulta ti plotting ti City Engineering Office tapno maammoan no anya a passet ti istruktura ti mademolish iti balayda Maribel Dela Cruz Balayog sadiay Iron Street, Upper Quezon Hill, Baguio City.
Iti kaudian a panakiuman ti Bombo Radyo Newsteam kenni Angel Nerveza, Engineer III iti City Buildings and Architecture Office, naipatungpal ti deliberation ti anti-illegal structures committee idi June 19, 2025.
Daytoy ti nagbalin a basaranda iti desisyon dagitoy.
Maipalagip nga immunan nga impeksa ni Balayog iti Bombo Radyo ti pakaseknan na gapu iti amak daytoy a ma-demolish ti pagtaenganda nga awanan iti building permit ken paset metlaeng iti road right of way.
Malidayan daytoy agsipudta, panggepna laeng a tarimaanen ti pagtaenganda tapno adda ti natalged a pagturugan dagiti annakna.
Nupay kasta, impasardeng ti City Buildings and Architecture Office ti panangtarimaanna agsipudta inreklamo ti kaarubana.
Kabayatanna, idi June 18, 2025 impeksa ni Cresencia Suprimedo, ti nangireklamo a kaaruba ni Balayog a nairaman ti naganna kalpasan a daytoy ti makagapu a posible a ma-demolish ti pagtaengan ni Balayog.
Inyebkasna a nagdamag daytoy iti maysa a kagawad nga isu met ti nangipadanon iti City Buildings and Architecture Office.
Gapu iti dayta, sinukimat ti nasao nga ahensia ti pagtaenganda Balayog.
Nupay kasta, kabayatan ti hearing dagitoy, naammoan nga awanan metlaeng iti building permit ni Supremido isu’t gapuna nga inriklamo met ni Balayog.
Iti agdama, manarimaan paylaeng ti imbistigasyon ti City Buildings and Architecture Office.//
