Indeklara ti Malakanyang ti Hulio a kinse, iti agdama a tawen kas special non-working holiday iti rehion Cordillera kas panagrambak ti maika-tallo pulo ket walo a founding anniversary ti rehion.
Ti Proclamation No. 939 ket pinirmaan ni Executive Secretary Lucas Bersamin babaen ti pannakabalin ni President Ferdinand Marcos Jr.
Nakalanad iti proklamasion a maipaayan ti oportunidad dagiti umili ti Cordillera a makipartisipar iti napatag nga okasion ken ragsaken ti panagrambak iti founding anniversary dagitoy.
Mangrugi ti panagramabak ti anibersario ita a tawen inton Hulio 1 iti Baguio Convention Center, nga agserserbi a host local government unit ti Baguio City babaen ti pannakitinnulongda iti Regional Development Council’s (RDC) Infrastructure Committee.
Addaan daytoy ti tema a “Securing the Future of a Unified Cordillera.”
Ti kangrunaan a programa ket inton Hulio a kinse a maangay iti Baguio Convention Center.
Manamnama a makipaset ti sumagmamano a national officials kas guests of honor ken speakers.
Idauluan met dagiti representatives ti Cordillera, gobernador, ken mayor ti bukodda a delegasion bayat ti tinnawen nga aktibidad.
Manamnama met a makikadua dagiti delegasion ti probinsia iti selebrasion, a panggepna nga itampok ti agtultuloy a panangiduron ti rehion Cordillera iti autonomous region kas imbilin ti 1987 a Konstitusion.
Maipalagip a naparnuay ti Cordillera Administrative Region babaen ti Executive Order No. 220 nga inruar ni daydi President Corazon C. Aquino idi Hulio 15, 1987.
Nakamandato iti 1987 Constitution ti pannakaaramid ti autonomous regions iti Cordillera ken Muslim Mindanao.
