Balligi ti panakaipatungpal iti 10th Fishing Tournament idiay Burnham Lake, Baguio City idi laeng June 28, 2025.
Iti panakiuman ti Bombo Radyo kenni Rafael Serrano, organizer iti Fishing Tournament Burnham Lake, adu ti nagrehistro para iti nasao nga aktibidad kasta metten dagiti nangipakita iti gagarda a makipaset.
Dagiti partisipante ket saan laeng a nagtaud iti Baguio City nu di ket adda pay dagiti naggapo kadagiti kabangibang a lugar.
Sigun kenni Serrano, makatultulong ti fishing tournament iti turismo iti siudad gapu ta daydaywen pay ti daduma daytoy.
Imbinglay ni Serrano a panggepda a mangipatungpal manen iti fishing tournament inton madanon ti Baguio Day ken panggepda nga itultuloy daytoy.
Kabayatanna, maangay met ti awarding ceremony kadagiti nangabak iti kalleppas nga edisyon daytoy inton July 21 kagiddan ti Flag Ceremony iti Baguio City Hall.
Makaawat ti first place iti PhP5000, PhP3000 met ti maala ti second place, bayat a PhP2000 ti maipaay iti third place.
Malaksid iti cash prize, maipaayan metlaeng dagitoy iti tropeyo.//Bombo Rob Dominguez
