Nasuspindir ti pito nga engineer idiay Madhya Pradesh, India kalpasan a nag-viral ti baro a Rail Over Bridge iti Bhopal a nasurok 90-degree turn.
Ti 648 meter a rangtay, nga aggatad ti 200 milion rupees wenno $2.3 milyon ket rumbeng kuma a mapapartak ti biahe para iti 300,000 nga indibidual, ngem nagbalin a sentro ti pammabalaw gapu iti delikado a disenyona.
Sigun kenni Chief Minister Mohan Yadav, dua a chief engineers ti karaman kadagiti nasuspindir, bayat a rugrugiandan ti panangimbestigar iti maysa a retirado a sub-engineer.
Blacklisted metlaeng ti construction agency ken design consultant a karaman iti proyekto.
Indepensa met ti chief engineer a kasapulan ti killo gapu iti kinakurang ti daga ken metro station iti aglawlag.
Panggep dagiti otoridad a gumatang ti kanayunan a daga tapno mapasayaat ti disenyo.
