Impasigurado ti La Trinidad Municipal Police Station a nakasagana dagitoy ken dagiti responders ti MDDRMO-La Trinidad nga agarayat iti aniaman a posible a mapasamak ita a panawen ti panagtutudo.
Iti pannakiuman ti Bombo Radyo kenni Police Captain Ronald Salingsing, Operations Officer ti La Trinidad Municipal Police Station, kinunana a nakasaganan dagiti materiales, kumpleto ken functional dagitoy a maaramat iti panagrespondeda.
Dumanon met iti 9 a Police Fixed Visibility Point (PFVP) nga imanmanehar ti 260 a police personnel ti naiwaras idiay La Trinidad tapno nalaka dagitoy nga agresponde iti kanito nga agkasapulan ti tulong ti publiko.
Sigun kenni Salingsing, ar-aramidenda amin a kabaelanda a maitunos iti mantra ti Philippine National Police a 5-minute response time.
Karaman kadagiti panagregget nga ar-aramidenda ket ti agtultuloy a panagpatrolyada kadagiti disso nga awanan ti Police Fixed Visibility Point (PFVP).
Idi met nadamag nu umdas ti logistics wenno dagiti lugan a maaramat para iti panagpatrolia, kinuna ni Salingsinga a kurang latta.
Inaklonna nga awan ti naimuntar a Police Fixed Visibility Point (PFVP) iti paset ti KM 3 gaputa awan ti mabalin a maaramat a lugan dagiti personnel.
Nupay kasta, adda met latta ti 26 a personnel ti mangbambantay iti nasao a disso.
Kabayatanna, awan ti naipaay a body-worn camera para kadagiti personnel ti Philippine National Police idiay La Trinidad, Benguet.
Nupay kasta, kinunana nga agar-aramatda ti alternative recording device a kas ti selpon.
Ngem sakbayda nga aramatenda dagitoy ket maipakada pay iti korte.
