Nakailista manipod iti napagtipon a datos iti Tabuk City Police Station, Tabuk City Fire Station, City Health Services Office, ken City Disaster Risk Reduction and Management Office iti 133 a road crash incidents para iti maikadua a kuarter ti 2025.
Iti nasao a bilang, kaaduan ket nairaman iti motorsiklo a nagresulta iti self-accident a dumanon iti 133.
Amin dagiti nadangran, a kaaduan ket drayber, ket nagsagaba iti kritikal ken kalkalainganna a pannakadangran.
Maiparparangarang iti report a human error gapu iti pannakabartek iti arak, distracted driving, napartak a panagmaneho, saan a nasayaat a panagkillo, overspeeding, ken inattentive driving ti kaaduan a rason ti pannakadungpar iti kalsada.
Napaliiw metlaeng ti bad road conditions ken ti presensya dagiti ayup kas dadduma pay a rason iti pannakapasamak ti pannakadungpar iti kalsada kadagiti kangrunaan a kalsada iti siudad.
Maibasar iti report, masansan a mapasamak ti aksidente ti lugan iti aniaman nga oras ti aldaw, a ti kaaduan ket mapaspasamak kadagiti barangay a lumabas iti provincial road.
Maiparparangarang iti datos a 95 a lallaki ken 38 a babbai ti nadangran, nga agtawen manipud 2 agingga iti 73.
Dumanon pay iti 122 kadagiti biktima ti agmanmaneho nga awan ti driver’s license, ken 13 ti nakainom iti arak idi napasamak ti insidente.
Gapu iti dayta, nagpalagip manen dagiti otoridad iti panagtulnog iti linteg trapiko saan laeng a para iti drayber nu diket para iti kinatalged dagiti magmagna ken dadduma pay nga agar-aramat iti kalsada.
