Insingasing ti maysa a mammanday-linteg a pabiagen manen ti Commission on Audit (COA) ti pre-audit kadagiti transaksion ti gobierno tapno malapdan ti korapsion kadagiti mairuruar a pondo, iti baet ti pakaseknan a natiliwan laeng dagiti iregularidad kalpasan a naipaulog ti badyet.
Insingasing ni Baguio City Rep. Mauricio Domogan ti nasao a banag bayat ti House committee on appropriations hearing iti naisingasing a badyet para iti komision idi kalman.
Sinungbatan met daytoy ni COA Commissioner Douglas Michael Mallillin babaen ti panangilawlawagna a mabalin nga iyemplementar ti komision ti maysa a selective pre-audit wenno panangipatungpal iti agency-wide pre-audit, kagiddan ti panangipaganetgetna ti kinapateg ti “digitalization.”
Dinakamat metlaeng ni Mallillin ti maysa a pammilin nga impaulog ti Department of Public Works and Highways (DPWH) idi tawen 2017, a mangimanmandato a ti proyekto ket kasapulan a maalaan ti ladawan nga addaan ti geotags ken GPS coordinates, tapno masigurado a ti proyekto ket adda.
Nupay kasta, kinuna ni Mallillin a makikikoordinardan kenni DPWH chief Vince Dizon para iti pannakaimplementar manen ti geotagging, tapno nalaka a masukimat ti COA ti proyekto sakbay pay a mapasamak ti aniaman a panagbayad.
Maipalagip nga idi 2011, maiparparangarang iti sumagmamano a report nga inikkat ti COA ti proseso ti pre-auditing.
Bigbigen ti chief ti nasao a komision iti dayta a panawen ti panggep ti pre-auding ngem kinunana a mabalin a mangitunda metlaeng daytoy iti “secret agreements.”
