Balligi a nakumpiskar ti agarup 61 a kilo ti dried marijuana leaves nga agbalor iti P7.3 million bayat a nakalibas dagiti dua a drug suspects bayat ti drug bust sadiay Brgy. Agbannawag, Tabuk City, Kalinga idi kalman.
Dagiti nakumpiskar ket buklen ti 59 a bricks ti dried marijuana leaves, lima a vacuum-sealed plastic bags a dried marijuana fruiting tops, ken ti motorsiklo dagiti suspects nga inaramatda a nangideliver iti daytoy sakbay ti nasao nga operasyon.
Ti nasao nga operasyon ket indauluan dagiti personnel ti Philippine Drug Enforcement Agency – Cordillera (PDEA-CAR), Mountain Province Provincial Office (lead unit of the operation) kaduada ti Apayao, Kalinga Provincial Offices ken ti local police.
Kabayatanna, impetteng ni Regional Director Derrick Arnold C. Carreon a ti maysa a suspect ket nabigbig a lalaki manipud Brgy. Agbannawag, bayat a ti saan pay a nabigbig ti kadua daytoy.
Gapu iti dayta, agtultuloy ti imbestigasyon ken follow up operation tapno masarakan dagiti suspects.
Sumango metlaeng dagiti suspects iti kaso iti panaglabsing iti Section 5, Article 2 of Republic Act 9165 wenno ti Comprehensive Dangerous Drugs Act of 2002.
