Nakairekord ti City Social Welfare and Development Office (CSWDO) ti walopulo ket tallo a kaso ti child abuse iti siudad ti Baguio bayat ti umuna a semestre ti agdama a tawen, nababbaba nu idilig iti insidente a naireport iti umuna a semestre idi napalabas a tawen.
Sigun kenni City Social Welfare and Development Officer 2 Janine Bravo, manipod idi Enero agingga Hunio idi napalabas a tawen, dumanon iti duapulo ket siam nga ubbing ti “at risk” wenno narisgo ken siam a pulo ket pito nga ubbing ti “in conflict with the law,” a nairekord ti lokal a gobierno.
Manipod iti walopulo ket tallo a kaso ti child abuse, limapulo ket dua ti babbai bayat a duapulo ket maysa ti lallaki, a mangiparparangarang a babbai ti kaaduan a biktima iti nagduduma a kita ti panangabuso a naaramid kontra kadakuada.
Sigun kenni Bravo, physical abuse ti agtaltalained a kadawyan a kita ti panangabuso a maar-aramid kontra kadagiti ubbing, nga addaan ti tallo pulo ket tallo a naireport; simmaruno ti ‘incest rape’ nga addaan ti duapulo ket maysa a kaso; ‘acts of lasciviousness’ a sangapulo ket tallo; sexual molestation a pito; neglect wenno panangbaybay-an a pito; ken emotional abuse a dua a kaso.
Maibasar iti datos a dinakamat ti nasao nga opisial, dumanon iti tallopulo ket tallo a kaso ti impila dagiti biktima kontra kadagiti “perpetrators” bayat a limapulo a kaso ti agtaltalinaed a saan a naipila gapu iti nagduduma a rason.
Dagiti ubbing a karaman iti age group a dose agingga kinse ket kaaduan kadagiti maab-abuso nga addaan ti tallopulo ket tallo a kaso; simmaruno ti age group a disi sais agingga disi siete nga addaan ti sangapulo ket pito a kaso; age group a siam agingga onse nga addaan ti sangapulo ket uppat a kaso; age group nga innem agingga walo nga addaan ti sangapulo a kaso ken age group a zero agingga lima nga addaan ti siam a kaso.
Dagiti met basol nga inaramid dagiti ubbing a “conflict with the law” ket ti panagtakaw (25), physical injury (20), mauling (16), panaglabsing iti Republic Act (RA) 9165 wenno Comprehensive Dangerous Drugs Act (4), mapapati a frustrated murder (4), attempted homicide (3), mapapati a panagtakaw (3), sexual molestation (3), slight physical injury (2), mapapati a sexual abuse (2), mapapati a panangrames (2), carnapping wenno motornapping (2), acts of lasciviousness (2), panagrames (2), ken panagtakaw, frustrated homicide, seksual a panangabuso, panaglabsing iti 8353 wenno panangrames, ken panaglabsing iti 11934 a sagaysa a kaso.
Maibasar iti datos, dumanon iti tallo pulo ket dua a kaso ti naipila kontra kadagiti ubbing a “conflict with the law” bayat nga innem a pulo ket lima ti agtaltalinaed a saan a naipila gapu iti nadumaduma a rason.
Dumanon iti innem a pulo a kaso dagiti ubbing a karaman iti age group 12-15 ti nadakamat a kaso; sarunuen dagiti adda iti 16-17 age group nga addaan iti 31; 18-20 age group nga addaan iti 2, ken dagiti adda iti 9-11 age group nga addaan ti uppat a kaso.
