Impetteng ti Commission on Elections (Comelec) a naituding a mangipaulog dagitoy iti show cause order kontra kenni Sen. Rodante Marcoleta.
Daytoy ket tapno ilawlawagna ti mapapati a non-disclosure iti poll campaign contributions-na.
Sigun kenni Comelec Chairman George Garcia napintas no ilawlawag ni Marcoleta ti nasao a banag tapno maipakita iti publiko a patas ti ar-aramiden ti opisina dagitoy.
Kinunana a rumbeng nga ilawlawagna no apay a saanna nga inkarga ti campaign contributions daytoy ken no nagapuan ti ginastosna bayat ti campaign period.
Daytoy ket kasaruno ti panangideklarana iti agarup P112 million campaign expenses-na nga awanan iti contributions ngem naduktalan nga iti Statement of Assets, Liabilities, and Net Worth (SALN) ket addaan laeng daytoy iti net worth a P52 million.
Kagiddan dayta, impaganetget ni Garcia nga awan ti mailaksid iti declaration of campaign contributions kas maibasar iti Omnibus Election Code.
