Baguio City- Maipanpannakel ita ti “Salaknib Tan Namnama” project ti Department of Education (DepEd) Cordillera gapu iti agtultuloy a suporta a sumangsangbay kadakuada manipud iti pribado a sektor tapno pasayaaten ken papintasen ti panagadal dagiti estyudante nga adda kadagiti adayo a lugar wenno dagiti makunkuna a last-mile public schools.
Iti maysa a programa ket pormal nga impaima ti Aboitiz Foundation ti naipasdek a silid pagadalan nga addaan iti 5Kw Solar PV system iti Bashoy Elementary School idiay Kabayan, Benguet.
Karaman kadagiti naited iti nasao a pagadalan ti libre nga internet connectivity babaen iti Starlink tapno maipaay ti inclusive, accessible ken de kalidad a panagadal iti tunggal estyudante nga adda kadagiti nasusulinek a lugar.
Ti nasao a programa ket nabaen iti inisyatiba ni DepEd Cordillera Regional Director Dr. Estela Cariño a pagtitipunen dagiti nagduduma a sektor ken iti kummunidad tapno pasayaaten ti sektor ti edukasyon kadagiti geographically isolated a lugar.
Impanamnama pay ti Aboitiz Foundation nga agtultuloy ti ited a suporta kadagiti pampubliko a pagadalan para iti digital access program a mangipaay iti renewable energy ken satellite connectivity.
Malaksid iti Aboitiz Foundation ket nagbalin a kabinnadang ti DepEd CAR ti nasao a proyekto dagiti kameng ti Philippine Army a nangipaay iti libre a labor wenno trabaho tapno maipasdek ti nasao a pagadalan ken ti City Savings Bank a nangited iti libre a construction materials.
Immuna metten a nakawat dagiti pagadalan iti Benguet kas ti Bakian Guinawan Elementary School, Marcelo Marquez National High School, Piminggan Elementary School, Bashoy Elementary School, Awing Primary School ken Labney Primary School.
Dimmar-ay iti nasao nga okasyon da Kqbayan Mayor Rex Aquisan, Impact Lead ti Aboitiz Foundation a ni Jowelle Ann Cruz, Philippine Army Battalion Commander Lt. Col. Jonathan Esnara, City Savings Bank Senior VP Atty. Roel Eric Garcia ken dadduma pay.//Bombo Jordan Tablac
