Impakaammo iti Philippine National Police (PNP) a bimmaba ti bilang dagiti focus crimes a nailista manipod January agingga December 2025.
Iti imbinglay iti nasao a law enforcement agency manipod iti Directorate for Investigation and Detective Management daytoy, dumanon iti pakabuklan a 35,717 dagiti krimen a nailista idi napan a tawen, 12.40% a nababbaba ngem iti 40,771 a krimen a nailista idi 2024.
Iti nasao a bilang, dagiti kaso iti panagrames wenno rape ti addaan iti kadaklan a bimmabaan.
Manipod iti 9,910 a kaso idi 2024, bimmaba daytoy iti 22.68% ken nagbalin laengin a 7,662 idi 2025.
Maikadua met ti carnapping nga addaan iti bimmabaan a 20.18% manipod iti 332 a kaso idi 2024 a nagbalin a 265 idi 2025.
Maikatlo ti murder a bimmaba iti 17.80% manipod iti 4,151 a nagbalin a 3,412, homicide a 1,078 manipod iti 1,268, physical injury a 4,811 manipod iti 5,593, robbery a 3,645 manipod iti 4,136 ken ti theft a bimmaba iti 4.31% manipod iti 13,232 a kaso idi 2024 a nagbalin a 12,662 idi 2025.
Sigun kenni PNP Acting Chief PNP PLTGEN Jose Melencio Nartatez Jr., ti panagbaba ti bilang ti kriminalidad iti pagilian ket maysa a mangipakita iti kinaepektibo ti Focused Agenda iti kapulisan ken ti panagregget dagiti kameng daytoy manipod nagduduma a yunit iti intero a pagilian.
