Kidkiddawen iti probinsia iti Benguet a mairaman iti deklarasion iti special non-working holiday iti siuad ti Baguio iti Pebrero 23, 2026 ti sibubukel a probinsia kas panangrambak iti Ibaloi Day.
Nangipila iti resolusion dagiti kameng iti Sangguniang Panlalawigan a da Lady Charmaine Molintas-Likigan ken Benjamin Palbusa, ti Indigenous Peoples Mandatory Representative iti probinsia, tapno pormal nga agkiddaw iti gobierno.
Iti agdama, indeklara ti Malakanyang ti Pebrero 23, 2026, kas maysa a non-working day iti siudad ti Baguio kas panangrambak iti Ibaloi Day babaen iti Proclamation No. 1125, a nairuar idi Enero 5, 2026.
Sigun kadagiti opisial iti Benguet, dagiti Ibaloi ket saan laeng a limitado iti siudad.
Iti pakaistoryaan ken kultura, dagiti Ibaloi ket orihinal a nagnaed iti siudad ti Baguio ken kadagiti munisipyu ti Benguet sakbay pay a naibangon ti Baguio kas maysa a naisina a chartered city, a nakalanad iti Resolusyon Blg. SP12-R-060.
Dagiti Ibaloi ket nakaramut iti probinsia ti Benguet, partikular kadagiti munisipyu ti La Trinidad, Tuba, Itogon, Sablan, Tublay, Bokod, Kabayan, Kapangan, Atok, ken dadduma pay a lugar nu sadinno da nga ibibiag ti kaugalian ken tradision.
Nailanad pay iti resolusion a ti pannakaisina ti Baguio City manipud iti Benguet babaen ti Baguio City Charter ket maysa laeng nga administratibo ken politikal a pannakabingbingay, ken saan a mangipasimudaag iti kultural, historikal, wenno kapuonan a pannakaisina dagiti Ibaloi manipud iti probinsia.
Kamaudiananna, siraraem a kiddaw ti resolusion ken ni Acting Executive Secretary Recto ken Presidential Assistant para iti Cordillera Administrative Region, Assistant Secretary Antonio Tabora Jr., a mairaman ti Probinsia ti Benguet iti Proclamation No. 1125.
