Mangrugin ti panakaipasdek ti two-storey building a maawagan iti Henry Sy, Sr. Hall ken ti athletic oval track idiay Philippine Military Academy(PMA).
Sigun kenni PMA Spokesperson Lieutenant Jesse Nestor Saludo, manamnama ti panaka-mobilize dagiti materyales a maaramat iti konstruksyon kadagiti sumarsaruno nga al-aldaw.
Imbinglay ni Saludo a dagiti nasao a proyekto ket pondoan ti SM Prime Holdings Incorporated.
Ti pakaipasdekan ti two-storey building ket addaan kalawa a 21 metro cuadrado nu sadino, agserbi ti umuna a kadsaaran kas multi-use dining facility a mabalin a mangakomodar iti 2,500 a kadete bayat a ti maikadua a kadsaaran ket agserbi nga opisina dagiti crew ken dagiti kadete.
Naituding met a maaramid ti 200 metro cuadrado nga athletic oval track asideg iti nasao a maaramid a pasdek.
Sigun kenni Saludo, manamnama a malpas dagiti nasao a proyekto inton 2027.
Kagiddan dayta, inlawlawag ti opisyal a saan laeng nga ita a naaddaan dagitoy iti kolaborasyon iti pribado nga entity para kadagiti proyekto iti nasao nga akademya iti sidong ti Public-Private Partnership(PPP) framework a paset metlaeng ti growth plan dagitoy.//Bombo Noveh Organo
