Kagiddan ti umadanin a panakarambak iti Strawberry Festival idiay La Trinidad, Benguet, agtultuloy latta ti panagturong dagiti turista sadiay partikular iti strawberry farm.
Dagiti sumarsarungkar ket dagiti aggap-apo idiay Pangasinan, Tarlac, Cavite, Metro Manila ken daduma pay a luglugar iti ruar ti rehion.
Maysa kadagiti aktibidad a padpadasenda ti strawberry picking a sigun kadagiti farmers ken vendors ket kasayaatan a padasen tunggal agsapa gapu ta saan unay a napudot.
Ngem iti baet ti mapasaran nukwa a napudot a panniempo iti nasao a munsipyo, saan latta a maliklikan dagiti turista nga idilig ti temperatura kadagiti nagtaudan dagitoy a luglugar a kadawyan a nadagdaga-ang.
Sigun kadagiti turista, ti temperatura ti maysa a rason iti panagpasyarda iti nasao a munsipyo a kas iti Baguio City ket nalamiis nangruna ita a mapaspasaran ti epekto ti Amihan wenno Northeast Monsoon.
Ti La Trinidad Strawberry Farm ket agluklukat iti tunggal alas otso iti agsapa(8:00AM) agingga alas sais iti sardam (6:00PM)tunggal aldaw.
Nupay kasta,ti panagrekep ti nasao tourist destination ket nakadepende metlaeng iti kaado dagiti sumarungkar.
Iti agdama, dumanon iti ₱700 tunggal kilo ti strawberry picking.//Bombo Jay Ann Gabrillo
