Naobserbaran nga immadu manen dagiti lugan kadagiti kalsada iti siudad ti Baguio sipud idi nangrugi ti Panagbenga Festival idi Pebrero 1, 2026 isu’t gapuna nga ad-adda a bimmuntog ti biahe dagiti drayber ken panagturong dagiti estudiante kadagiti pagadalanda.
Ad-adda a nailet dagiti pagnaan gapu kadagiti panagsangbay dagiti turista para iti tinnawen a panangrambak iti piesta.
Gapu iti daytoy, adu nga estudiante ti nasapsapa nga umikkat iti pagtaengan ken nanginayon kadagiti orasda tapno saan a maladaw iti klase.
Iti baet ti nadagsen a trapiko, agtultuloy ti panangimanehar dagiti otoridad tapno maipasigurado ti kinatalged iti publiko.
Nabuntog ti taray dagiti jeepney ken manaynayunan pay dagiti pribado a lugan ken tourist van ti kinaadu iti agbibiahe, nga agresresulta iti ad-adda nga atidog nga oras iti panagbiahe.
Sigun kadagiti dadduma a drayber, ad-adda a kimmaro ti trapiko iti tunggal lawas, nangruna iti malem ti Biernes agingga iti Domingo. Gapu iti daytoy, nakessayan ti biaheda iti maysa nga aldaw ken napa-atidog ti orasda iti panagtrabaho.
Kabayatanna, nadutukan ti kanayunan a personnel ti Baguio City Police Office kadagiti kangrunaan a kalsada ken temporario a naipaserra ti sumagmamano a pagnaan para kadagiti aktibidad a maisayangkat iti sumaruno nga aldaw.
Guyguyuguyenna ti publiko nga agtulnog iti linteg-trapiko, agaramat iti parapubliko a transporations, ken panggepen ti panagbiahe tapno makatulong iti panangkessay iti gunay iti sasakyan bayat nga agtultuloy iti panangrambak ti Panagbenga Festival.
