BAHRAIN- Nerbios ti marikrikna dagiti sumagmamano nga Overseas Filipino Workers (OFW) sadiay pagilian a Bahrain, gapu iti agtultuloy a panagatake ti pagilian Iran iti sumagmamano a paset ti pagilian a Bahrain.
Iti interview ti Bombo Radyo iti maysa nga OFW sadiay Bahrain a nangilimed iti naganna a “Pia”, kinunana nga agtultuloy paylaeng ti mangmangeganda a kanalbuong.
Sigun kenkuana, agsardeng iti apagbaiit ken maituloy manen.
Innayonna pay nga ibalbalakad kadakuada dagiti “Among” wenno bossda nga agtalinaedda kadagiti uneg ti pagtaengan dagitoy.
Mainaig iti dayta, rumrumsua ti panic kadagiti tattao sadiay Bahrain gapu iti agtultuloy a mangmangeganda a kanalbuong.
Sigun kenni Pia, daytoy ti kaunaan a gundaway a nakangegda iti kanalbuong.
Iti baet dayta, agtultuloy latta ti panagtrabaho dagitoy bayat a dadduma ket nagbakwit.
Kabayatanna, impetteng ni Pia a saan paylaeng a sigurado no agawid iti pagilian no maipatungpal ti repatriation.
Nupay kasta, kinunana nga awan ti maaramidanna no diket agawid, iti kanito nga agtultuloy ti pannakaatake ti pagilian a Bahrain.//mp4
