Baguio City- Nakapasan iti maikadua a pannakaibasa ti gakat ni Benguet Cong. Eric Go Yap para iti pannakasuspendir ti excise tax kadagiti produkto a petrolyo.
Ti nasao a gakat ket karaman iti consolidated measure dagiti members iti House of Representatives tapno aramaten ni President Ferdinand Marcos Jr. ti emergency powers na tapno masuspindir ti excise tax kadagiti produkto a lana.
Ti House Bill 8418, wenno ti “An Act authorizing the President to suspend or reduce excise taxes on petroleum products during national or global economic emergencies,” ket agserbi kas substitute bills iti sangapulo ket innem a dadduma pay a gakat ken dua a joint resolutions.
Karaman iti pinal a bersyon ti kongreso ti House Bill 8351 ni Cong. Yap a dakkel a makatulong iti panagkapsot iti ekonomiya gapu iti mapaspasaran a krisis idiay Middle East.
Gapu iti daytoy ket impeksa ti manmanday-linteg ti panagyaman na iti Committee on Ways and Means gapu iti pannakairaman ti gakat na iti maymaysa a House Bill a naituding a matalantan iti pinal a pannakaibasa na sakbay ti legislative break. Kadwa ni Yap da House Majority Leader Ferdinand Alexander “Sandro” Marcos ken Speaker Faustino “Bojie” Dy III para iti napartak a panaakaipasa ti nasao a gakat.//JRTablac
