Guygoyugoyen iti Benguet Electric Cooperative (BENECO) dagiti ‘beneficiaries’ iti Pantawid Pamilyang Pilipino Program (4Ps) ken dadduma pay a nakurapay a pamilia a gundawayan ti lifeline rate nga indiaya iti kooperatiba.
Sigun kenni BENECO General Manager Melchor Licoben, 354 ti nakarehistro a lifeline beneficiaries a nakaawat iti pakabuklan nga exemption wenno discount iti nakonsumoda a kuryente.
Inlawlawag ni Licoben a dagiti kameng iti 4Ps ken nakurapay a ‘consumer’ nga agkonkonsumo iti agingga iti 50 kilowatt-hours (kWh) tunggal bulan ket makaawat iti 100% a diskwento iti electric bill da.
Daytoy ket panagbalbaliw manipod iti sigud a 45 kWh a naikeddeng iti sidong iti Electric Power Industry Reform Act (EPIRA), a naamyendaran idi Pebrero 2024 ken naiyemplementar sipud iti billing period iti Marso 2026.
Dagiti saan met a karaman iti 4Ps nga agkonkonsumo iti 50 kWh agpababa ket mabalin metlaeng nga agnumar iti subsidiya, la kitdi makaalda iti certification manipod iti lokal a Social Welfare and Development Office (SWDO) a mangpaneknek a dagitoy ket indigent wenno karaman iti marginalized households.
Kabayatanna, dagiti kwalipikado a ‘households’ nga agkonkonsumo iti 51–70 kWh ket mabalin a makaala iti 35% a diskwento, bayat a dagiti agkonkonsumo iti 71–100 kWh ket addaan iti 20% a diskwento.
Innayonna pay nga agtaltalinaed ti kadawyan a discount para kadagiti senior citizens a 5% para iti nakonsumuda nga agingga iti 100 kWh tunggal bulan.
Impaganetget ni Licoben a kasapulan nga agparehistro dagiti kwalipikado a ‘consumer’ tapno makaala iti discount.
Daytoy a benepisio ket pinondoan dagiti non-lifeline consumers babaen iti singir iti maysa a sentimo iti tunggal kilowatt-hour tapno mapagtalinaed ti pondo.
Aniaman a sobra wenno kurang iti koleksion ket isimsimpa iti administrator iti pondo tapno maipasigurado ti natibker ken nasayaat iti programa.
Maibasar iti datos iti Department of Social Welfare and Development (DSWD), dumanon iti 6,500 beneficiaries iti 4Ps iti Baguio ken 8,009 met iti Benguet.
Kabayatanna, immunan nga impablaak iti BENECO ti panagngato bassit iti singir iti kuryente gapu iti panagngato iti presio iti lana, a maimatangan iti billing iti Abril.
