Natiliw ti uppat nga indibidual idiay Guinobatan, Albay gapu iti mapapati a panangilakoda iti gasolina, sigun iti Philippine National Police (PNP).
Iti naisayangkat nga entrapment operation, nakemmeg dagiti suspek a nabigbig a da alyas “Karl,” “Malyn,” “Nel,” ken “Meo” idiay Barangay Maipon.
Sigun kadagiti otoridad, mangilaklako kano iti fuel dagiti suspek idi awanan dagitoy iti pammalubos, a panaglabsing iti Batas Pambansa Blg. 33.
Nakumpiskar iti operasion iti tallo a portable micro fuel dispensers, maysa a tangke iti gasolina, dagiti resibo iti panangilako, ken marked buy-bust money, a mapatta-patta nga aggatad iti P2.32 milyon.
Agdama nga adda iti kostodia iti pulisia dagiti suspek para iti dokumentasion ken inquest proceedings.
Sigun kenni PNP Chief Jose Melencio Nartatez Jr., paset iti operasion iti agtultuloy a kampania tapno paksyaten dagiti iligal nga aktibidad a mabalin a mangapektar iti suplay iti gasolina ken mangitunda iti pangta iti publiko.
Nagpalagip ni Nartatez kadagiti mangilaklako iti fuel a sumurot kadagiti regulasion ken kidkiddawenda iti publiko nga ipadamag wenno ireport kadagiti otoridad ti aniaman a mapagduaduaan nga iligal nga aramid seknan iti panangilako iti gasolina.
