Pumanaw na sa edad na 43 si Leonid Radvinsky, ang negosyanteng kilala sa pagbili at pagpapalago ng OnlyFans bilang isang multibilyong dolyar na kumpanya. Kinumpirma ng kompanya ang kanyang pagpanaw noong Lunes matapos ang matagal na pakikipaglaban sa cancer.
Ayon sa pahayag ng OnlyFans, “mapayapa siyang pumanaw” at humiling ang kanyang pamilya ng pribadong pagluluksa sa panahong ito.
Si Radvinsky, na nakabase sa Florida, ay ipinanganak sa Odesa at lumaki sa Chicago, Estados Unidos. Noong 2018, binili niya ang 75% na bahagi ng Fenix International Limited, ang kumpanyang nakabase sa London na nagmamay-ari ng OnlyFans, kung saan nagsilbi siya bilang direktor at pangunahing shareholder.
Sa ilalim ng kanyang pamumuno, sumikat nang husto ang OnlyFans lalo na noong panahon ng COVID-19 pandemic. Umabot ito sa humigit-kumulang 377 milyong users at 4.6 milyong content creators sa buong mundo.
Noong 2024, nakapagtala ang kumpanya ng $1.4 bilyong netong kita, kung saan kumukuha ito ng 20% komisyon mula sa kita ng mga creator. Tinatayang umabot sa $5.5 bilyon ang halaga ng kumpanya sa mga paunang usapan ng pagbebenta ngayong taon.
Nagtapos si Radvinsky ng kursong economics sa Northwestern University at tinatayang may net worth na $3.8 bilyon ayon sa Bloomberg Billionaires Index noong nakaraang Mayo. Noong 2024, inilipat niya ang kanyang pagmamay-ari sa LR Fenix Trust.
Bukod sa OnlyFans, pinamunuan din niya ang “Leo,” isang venture capital fund na itinatag niya noong 2009 na nakatuon sa mga teknolohiyang pamumuhunan. Kilala rin siya sa kanyang mga gawaing pangkawanggawa, kabilang ang pagsuporta sa pananaliksik laban sa cancer at sa mga open-source na proyekto.
