Simmangpeten iti pagilian a Pilipinas ti kaunaan a shipment ti imported diesel idi kalman, Marso 26 kas paset iti addang tapno masigurado ti suplay dagiti lana iti pagilian.
Sigun iti Department of Energy (DOE), agarup-kumurang 22.5 milyon a litro wenno 142,000 bariles ti diesel ti naawat ti pagilian kas paset iti addan a panangpreserba ti Pilipinas ti enerhiya.
Ti nasao a panagangkat ti petrolyo ket maitunos iti direktiba ni President Ferdinand Marcos, Jr. iti sidung ti Executive Order No. 110 wenno iti Emergency Energy Security Program.
Panggep ti nasao a programa a protektaran dagiti umili ken industriya kontra iti panagngato ti presyo dagiti produkto a lana iti world market babaen iti panangnayon ti nasao a produkto.
Sigun met kenni Energy Secretary Sharon Garin, ituloy ti nasao nga ahensya nga imonitor ti supply ti lana tapno masigurado a saan unay a maapektaran ti transportasyon ken trading iti pagilian. //bombokaren. c.s
