Tapno maprotektaran ti pagilian kontra iti agbalbaliw a presyo ti produkto a petrolyo ken killaat a panagkurang iti suplay, maisingsingasing ita iti Kamara a maaramat ti bilyon a kita manipud Malampaya Deep Water Gas-to-Power Project para iti pannakaimuntar dagiti strategic fuel reserves.
Sigun kenni House Minority Leader Marcelino Libanan, nasken a gundawayan ti gobyerno ti makolkolekta a royalties manipud kadagiti proyekto tapno mapundoan ti pannakaimuntar dagiti coastal petroleum storage facilities iti sidung ti Philippine National Oil Company (PNOC).
Maibasar iti datos ti Budget of Expenditure and Source of Financing (BESF), dumanon iti P200 bilyon ti nakolekta a pondo ti gobyerno manipud iti Malampaya manipud tawen 2014 agingga 2024.
Katukad daytoy ti P18.2 bilyon nga average a kita tunggal tawen.
Inlawlawag ni Libanan a manamnama a dumakel pay ti sumrek a pondo iti gobyerno iti sumarsaruno a tawen kalpasan iti naballigi a drilling iti dua a baro a gas wells iti nasao a pasilidad. //bombokaren.c.s
