Naduktalan dagiti otoridad ti nagtaudan ti palso a damag seknan iti salun-at ni President Ferdinand Marcos Jr.
Nupay kasta, agtaltalinaed paylaeng a confidential dagiti detalye bayat a manarimaan ti imbestigasyon.
Sigun kenni Department of Information and Communications Technology (DICT) Secretary Henry Aguda, inggem ti Cybercrime Investigation and Coordinating Center (CICC) ti imbestigasyon.
Naipaima metten iti Philippine National Police ken Department of Justice dagiti naduktalan para iti posibli a pannakaipila ti kaso.
Kabayatanna, impaganetget ni Aguda a saan nga agpakampante dagiti agiwarwaras iti palso a damag iti baet a na-deleteda ti impablaak dagitoy.
Inlawlawagna a naipamaysa ti akem ti DICT ken CICC iti digital forensics ken evidence preservation.
Gapu iti dayta, amin a plataporma ket makitinnulong kadakuada tapno maipreserba ti ebidensia.
Iti agdama, maisagsaga ti kaso kontra kadagiti indibidual a nangiwaras iti palso a damag.
