Rimmuar iti panagdengngeg iti Senate Blue Ribbon Committee nga idadauloan ni Senador Pia Cayetano, ti nakaro nga alegasion manipod kadagiti indibidual a nagpabigbig a sigud a Marine seknan iti mapapati a panangipaay kadagiti maleta a naglaon iti kuwarta iti sumagmamano a pulitiko ken personalidad.
Sigun iti testigo a ni Johnny Buduan, idi tawen 2022 ket nangitulodda iti lima a maleta idiay Ilocos Norte, ken kinunana a nadengngegna daytoy a para kenni President Ferdinand Marcos Jr.
Inladawanna metlaeng ti mapapati a panagaramat iti bulletproof a lugan ken koordinasion iti dadduma pay nga indibidual a nadakamat iti panagdengngeg.
Maysa pay a testigo ti nangibaga a nakadanonda iti maysa a balay idiay Paoay nu sadinno mapapati a naimatangan dagiti ladawan iti pamilia Marcos, ken nakaumay dagiti sumagmamano a kameng iti pamilia, karaman ni President Marcos Jr.
Kabayatanna, impaganetget iti Palasyo a rumbeng a mangipakita paylaeng iti ebidensia dagiti akusado sakbay a maipaayan ti dagsen dagiti pammabasol.
Mainaig iti daytoy, naibutaktak metlaeng iti panagdengngeg iti Senado ita nga aldaw dagiti alegasion manipod iti sangapulo ket walo nga indibidual a nagpabigbig a sigud a Marine seknan kadagiti iregularidad iti flood control projects.
Maibasar iti “salaysay,” adda dagiti maleta a mapapati a naglaon iti kuarta a naitulod iti sumagmamano a personalidad.
Karaman kadagiti napanaganan iti alegasion da sigud a Senate President Vicente Sotto III, Senador Erwin Tulfo, ken dagiti mammanday-linteg a da France Castro ken Congressman Leila de Lima.
Sigun iti maysa a resource person a ni Bernard Gumban, mapapati a dua a gundaway a nangitulod kadagiti maleta kenni Sen. Tulfo, ken mapatta-patta a naglaon dagitoy iti sag-P20 milion agingga P50 milion a nakadepende iti kinadakkelna.
Iti umuna a delivery, mapatta-patta a dumanon iti P60 milion agingga P70 milion ti pakabuklan, ken mapapati a dumanon iti agingga iti P150 milion iti maikadua a gundaway.
Kasaruno iti daytoy, inyebkas ni Senador Alan Peter Cayetano ti panagdanagna kadagiti nasao a damag a rimmuar iti panagdengngeg.
Iti agdama, awan pay ti kumpirmasion wenno pormal nga ebidensia a nairuar a mangpaneknek kadagiti pammabasol, ken awan pay ti nairuar nga official statement ti sumagmamano a napanaganan.
Kabayatanna, malaksid kadagiti nasao a senador, karaman metlaeng ni Senador Loren Legarda nu sadinno mapapati a nakaawat iti dua a medium-sized a maleta.
Nupay kasta, saan a nadakamat wenno natalantan dagiti testigo iti testimoniada iti panagdengngeg iti Blue Ribbon Committee ita nga aldaw, a nangitunda kadagiti damag nu apay a saan a nairaman ti nasao nga alegasion kadagiti statement a naipasango iti komite.
