Kinumpirmar dagiti kapulisan idiay Prague nga “aware” dagitoy iti sitwasyon ti Pilipino nga adda pakainaiganna ti kaso ngem saanda pay laeng a mangipaay iti kanayunan a detalye seknan iti pannakaaresto ti sigud a mammanday linteg a ni representative Zaldy Co.
Innayon pay dagitoy a ti Ministry of Interior da laengen ti makasarita seknan iti nasao nga isyu.
Sigun iti report, maysa a press officer ti Czech police ti nangdakamat a maisimsimpa pay laeng ti impormasyon seknan iti pasamak sakbay a mairefer daytoy iti maseknan nga ahensya para iti pormal nga statement.
Kabayatanna, agtaltalinaed nga awan pay laeng ti statement manipud iti Philippine Embassy idiay Czech Republic seknan iti detalye ti pannakaaresto ni Co ken nu mangipaay dagitoy iti consular assistance para iti sigud a mammanday-linteg.
Sumangsango ni Co iti kaso a graft malversation kadua ti 15 pay nga indibidwal nga adda pakainaiganna iti maatap a substandard nga P289- milyon a flood control project idiay Naujan, Oriental Mindoro.
Maururay met ti opisyal a kumpirmasyon manipud iti benneg ti Czech Republic kabayatan nga agtultuloy ti koordinasyon iti nagbaetan dagiti ahensya ti Pilipinas ken Czech Republic. //bombokaren.c.s
