Immapela ni Senate Deputy Majority Leader JV Ejercito kenni Senador Ronald “Bato” Dela Rosa a boluntaryo a saanna nga awaten ti sweldo ken allowances-na.
Daytoy ket bayat a saan a sumsumrek iti trabaho.
Sigun kenni Senador Ejercito, saan a sinumsumrek iti senado ni Dela Rosa sipud idi Nobiembre 2025 kalpasan a naipadamag ti maatap nga arrest warrant manipud iti International Criminal Court (ICC).
Innayonna a ti serbisyo publiko ket talek ti umili, isu’t gapuna a nasken a takderan dagiti naibutos nga opisial.
Sigun pay iti Deputy Majority Leader, kasapulan a maamyindaran ti patakaran ti Senado tapno maaddaan iti nalawag a pannusa dagiti agabsent a Senador.
Iti agdama, awan paylaeng ti pinal nga aksyon ti Senado seknan iti naisingasing a “no work, no pay” policy para kadagiti agabsent senador.
