BAGUIO CITY – Manamanama a maipatungpal ti Fishing tournament iti Burnham Lake intun Setiembre 1, 2026.
Daytoy ket kalpasan ti tallo a bulan manipud iti pannakaileppas ti konstraksion ti Lake a naituding intun Hunio iti agdama a tawen.
Iti interview ti Bombo Radyo kenni Mr. Rafael Serrano, Fishing Tournament Organizer iti siudad ti Baguio, kinunana nga ad-adda a nalisnis dagiti ikan a maikabil sadiay.
Innayonna pay a mailubos iti lake ti 2,000 nga Eel wenno Igat; 3,000 a tilapia ken agarup 3,000 a red tilapia.
Kabayatanna, kidkiddawenna iti publiko a liklikan ti agkomento iti negatibo seknan iti fishing tournament.
Daytoy ket kalpasan ti panangbabalaw ti publiko idi napalabas a tawen, seknan iti panagkiddawda iti registration fee para iti fishing tournament.
Inyunay-unay ni Mr. Serrano nga imbes nga agkomento iti negatibo, maKipaset laengen dagitoy iti nasao a tornio.
Mainaig iti dayta, inyunay-unayna a saanda a lapdan ti publiko nga agbanniit iti lake, la kitdi addaan dagitoy iti fishing permit manipud iti City Environment and Parks Management Office (CEPMO).//mp4
