Dumanonen iti P6.6 milyon ti gatad ti nadadael iti sektor ti agrikultura idiay Albay gapu iti agtultuloy a panag-alboroto ni Bulkang Mayon.
Sigun iti datos ti Provincial Agricultural Office, naapektaran dagiti talon ti palay ken dadduma a high-value crops kadagiti lugar a Camalig, Guinobatan, ken Daraga.
Dumanonen iti 87 a mannalon ti palay ti direkta a naapektaran iti nasao a kalamidad.
Dakket metlaeng ti epekto na ti napuskol nga ashfall manipud iti bulkan a nangpirdi kadagiti mula a sili, tarong, okra, ken mais.
Kaaduan kadagitoy, nakasaganan kuman a maapit ngem nadadael dagitoyen gapu iti ashfall.
Agtultuloy met a bambantayan dagiti otoridad ti sitwasyon bayata nga agtultuloy a naipasidong ti nasao a bulkan iti Alert Level 3, kayatna a sawen adda paylaeng ti pangta ti posible a panagbuga ti bulkan iti lava, abo, ken dadduma pay. //bombokaren.c.s
