Impetteng ti dua a miembro ti House justice committee nga agarup 200 a mammanday linteg ti manamnama nga agbotos para iti pannaka-impeach ni Vice President Sara Duterte.
Sigun kenni Tingog Party-list Rep. Jude Acidre, namnamaenda a makaalada iti 200 agingga 215 a botos.
Nupay kasta, kinunana nga iti agdama ket sitatalgedda a makaalada iti 180 a botos.
Impetteng ni Acidre a dadduma kadagiti kameng ti Kamara nga immuna a managduadua ket nakombinsir kalpasan a naibutaktak dagiti binilbilion a pisos a saan a naideklara iti Statements of Assets, Liabilities, and Net Worth (SALNs) ni VP Duterte, ken dadduma pay a rebelasyon.
Kabayatanna, immanamong ni Bicol Saro Party-list Rep. Terry Ridon iti kinuna ni Acidre.
Sigun kenni Ridon, nasurok a two-thirds kadagiti kameng ti Kamara ti pabor iti impeachment ti Bise Presidente iti agdama.
