Inwaragawag ti Malakanyang a pinaglibakan ti Department of Agriculture ti damag a nag-angkat wenno nag-import ti gobyerno ti Pilipinas iti repolyo.
Sigun kenni Palace Press Officer Undersecretary Claire Castro bayat ti Palace press briefing itay nabiit, nakasaritada ni Agriculture Secretary Tiu Laurel Jr., nu sadino kinuna ti opisyal a saan a pudno ti ibagbaga ni Senator Imee Marcos nga agang-angkat ti Department of Agriculture iti imported cabbage.
Maipalagip nga itay nabiit ket kinuna ngamin ni Senator Marcos nga agtultuloy ti panagsangpet dagiti imported cabbage iti pagilian.
Dinakamatna a nababa ti pangilaklako dagiti mannalon kadagiti apitda a repolyo iti nababa a farmgate price.
Gapu iti daytoy, kiniddaw ti senador iti gobyerno a gatangenda ti mula dagiti mannalon a nateng.
Maibasar iti kaudian a monitoring ti Benguet Agri-Pinoy and Trading Center ita nga aldaw, Mayo 8, 2026, dumandanon laeng iti P2 agingga P6 ti presyo ti tunggal kilo ti repolyo.
