Naannayas ti gunay iti panagrehistro iti munisipyu iti Kabayan, Benguet iti maudi a voter registration nangruna itay agsapa.
Iti pannakiuman iti Bombo Radyo kenni Mr. Alexander Penrad, Election Officer iti Kabayan, Benguet, kinunana a namnamaenna ti posible a panagturong dagiti agparehistro ngem posible a bassit ti agturong gaputa namin-adu a nagrikusda iti sangapulo ket tallo a barangay iti munisipyu ken naisayangkat pay ti sattelite registration.
Maibasar iti datos iti agdama a bulan ti Mayo agingga itay agsapa, dumanon iti 620 ti nagparehistro nga indibidual.
Sigun kenkuana, adu ti baro a nagparehistro bayat nga adu metlaeng ti naikkat iti database gaputa dua a daras a saanda a nagbotos.
Inaklonna nga iti napalabas a mano a bulan, dagiti kangrunaan a karit iti panagparehistro ket ti kinaadayo dagiti barangay iti munisipyu, ken ti transportation a maaramat gapu iti kinangina iti krudo ken ti krisis a mapaspasaran ti pagilian.
Kinunana a nadanonda metten ti sangapulo ket tallo a barangay iti Kabayan, Benguet.
Kabayatanna, impettengna a saanen a rumbeng a maipaayan iti pannakailaylayon iti panagrehistro idiay Kabayan gaputa naaramidda ti pagrebbenganda nu sadinno indanon ti serbisio iti nasao nga opisina iti nagduduma a barangay.
Para kenkuana, nawaya ti nasao nga aldaw a panagparehistro dagiti umili sadiay.
