Dumanon iti dandani kagudua kadagiti lugan a naipasidong iti random roadside smoke emission testing manipod Enero agingga Marso iti agdama a tawen ti napaay iti panagsukimat, sigun iti City Environment and Parks Management Office (CEPMO).
Iti 378 a nasukimat, 172 ti nakapasa ken 206 ti napaay, bayat a 21 iti 399 a na-flag a lugan ti saan a nasukimat.
Karaman kadagiti natakuatan ket ti parapubliko a jeepney, pribado a lugan, taxi, ken maysa a bus.
Paset daytoy iti tinnawen a programa iti RITMT nga isaysayangkat dagiti saan a naibutaktak a lokasion.
Dagiti napaay ket naipaayan iti citation ticket ken kasapulan a maipasidong iti corrective measures, karaman ti re-testing nga addaan iti limitado a gundaway.
Iti datos iti 2025, 675 iti 1,195 a nasukimat a lugan ket saan a nakapasa.
Dagiti aglabsing ket mabalin a sumango iti dagos a pannakatiliw nu saan a sumungbat iti naipaay a palugit iti panangisimpa kadagitoy.
Agkidkiddaw iti CEPMO kadagiti barangay a tumulong iti kampania kontra iti smoke belchers ken maguygoyugoy ti publiko nga ireport dagiti lugan a mangiruruar iti napuskol nga asok.
