Pimmusay ti tallo nga indibidual kalpasan a nadungpar ti tricycle a nagluganan dagitoy itay nabiit iti paset ti Kennon Road, Sitio Canubas, Brgy. Camp 4, Tuba, Benguet.
Maibasar iti report ti kapulisan, napasamak ti insidente alas-onse ti rabii idi Mayo 31 ngem naireport laeng daytoy pasado alas-dose ti parbangon idi Hunyo 1.
Ti nasao nga aksidente ket nairamanan ti maysa a pick-up a lugan nga imanmaneho ti 68-anyos a lalaki, residente ti Irisan, Baguio City, ken maysa a tricyle nga imanmaneho met ti 43-anyos a lalaki, residente ti Camp 1, La Union.
Karga ti nasao a tricycle ti uppat a pasaeros pakairamanan ti 13-anyos a babae; 66-anyos a lalaki, residente ti Camp 4, Tuba, Benguet; maysa a babae a residente ti Camp 1, Rosario, La Union; ken maysa pay a babae a saan pay a nabigbig.
Iti imbestigasyon dagiti otoridad, paturong idiay La Union ti pick up no sadino agovertake kuma daytoy idi saanna a nadlaw ti pasungad a tricycle iti opposite line.
Gapu iti dayta, nadungpar daytoy ti nasao a tricycle ken gapu iti impact ti panangdungparna, naipurwak ti tricycle iti lima a metro palikod ken naisina ti sidecar daytoy.
Dagos a naitaray iti ospital ti 13-anyos a babae a pasaero ti tricycle ken ti driver daytoy babaen iti Tuba Municipal Disaster Risk Reduction and Management Office ambulance bayat a dagiti tallo pay a pasaeros ket dead on the spot gapu iti nakaro a dunor a nasagrap dagitoy.
Iti sabali a bangir, saan met a naan-ano ti driver ti pick up ken dagiti pasaerona.
Iti kaudian a damag, awan pay laeng ti eksakto a cost of damage iti nasapamak nga aksidente.
Iti agdama, addan ti nasao a driver iti kustodiya dagiti kapulisan para iti kanayunan nga imbestigasyon.
Posible a sumango daytoy iti Reckless Imprudence resulting in multiple homicide, physical injuries, ken damage to property.
Nupay kasta, maibasar iti impormasyon a nakalap ti Bombo Newsteam, addan ti initial a tungtungan iti nagbaetan dagiti sumagmamano a pamilya dagiti biktima ken iti driver ti nasao a pick up. //Bombo Noveh Organo
