Inawagan ni President Ferdinand Marcos, Jr. ti Kongreso para iti maysa a special session inton Hulyo 17 tapno talantanen dagiti sumagmamano a priority bills para iti pannakapapigsa ti social protection ken pannakapasayaat ti kalidad ti biyag dagiti Pilipino.
Babaen iti Proclamation No. 1318, mapagsasariaan iti nasao a special session ti National Center for Geriatric Health, dagiti mangamyenda iti Government Assistance to Students and Teachers in Private Education (GASTPE) Act, Assistance to Individuals in Crisis Situations (AICS) Act, ken dagiti mangamyenda iti Universal Access to Quality Tertiary Education Act (UAQTEA).
Sigun pay iti nasao a proklamasyon, matalantan met ti Last Mile and Geographically Isolated and Disadvantaged and Conflict‑Affected Areas (GIDA) Schools Act, dagiti mangamyenda iti Masustansyang Pagkain Para sa Batang Pilipino Act, Anti‑Political Dynasty Law ken iti Presidential Merit Scholarship Program.
Panggep ti nasao a sesyon a mapapartak ti panangipasa dagiti linteg a mangipaay ti tulong iti sektor ti edukasyon, salun-at, ken ekonomia.
Nabilin met ti Commission on Appointments a pagsaritaanda dagiti baro a pannakadutok ti gabinete, militar, ken foreign services, kas maitunos iti Konstitusion ken dagiti agdama a linteg. //Bombo Khey
