Inwaragawag ni Senator Erwin Tulfo a saan nga inmannamong ti sumagmamano a kongresista iti bersyon ti senado nga i-institutionalize ti Assistance to Individuals in Crisis Situations (AICS) gapu iti probisyon a mangipawil kadagiti opisyal ti gobyerno a makipaset iti panangipaay kadagiti ayuda.
Sigun kenni Sen. Tulfo, naaddaan iti ‘deadlock’ wenno saan a panagkikinnaawatan gapu iti kontrobyersyal nga ‘anti-epal provision’.
Sigun pay iti nasao a senador, nalawag iti nasao a probisyon a maiparit kadagiti nabutosan nga opisyal ti direkta a panakipasetda iti panangipaay iti tulong pinansyal manipud iti Department of Social Welfare and Development (DSWD).
Maysa gamin ti AICS iti programa ti nasao nga ahensya a mangipapay iti pinansyal a tulong kadagiti indibidual nga agkasapulan.
Gapu iti saan a panagkikinnaawatan, manamnama a matalantan manen ti nasao a gakat iti bicameral conference committee tapno agtunos ti bersyon ti senado ken Kamara. //bombokaren.c.sapirao
