Immanugot ni Senator Erwin Tulfo iti nagbalin a sungbat ni Defense Secretary Gilbert “Gibo” Teodoro iti naawatna a surat a maatap a manipud China bayat iti panagsaritana idiay Seoul Defense Dialogue idiay South Korea.
Iti nasao a forum, inbasa ni Teodoro ti nasao a surat a naglaon iti posisyon ti Beijing a saanda a bigbigbigen ti 2016 South China Sea arbitration ruling.
Kinuwestionaran met ni Teodoro nu apay nga inyawatda ti nasao a surat bayat iti panagsaritana ken inawaganna daytoy kas kinaawan-respeto iti international forum ken iti host a pagilian a South Korea.
Impetteng metlaeng ni Teodoro a saan laeng a kinaawan respeto iti international law ti inaramid da nu diket kaawan iti basic decency a rumbeng nga ipakitada iti host ken kadagiti nakipaset iti forum.
Gapu iti daytoy, kinuna ni Senator Tulfo nga umanamong unay daytoy iti nagbalin a sungbat ni Teodoro ken inawaganna pay a maysa a panangbastos iti defense secretary ti inaramidda kenkuana.
Innayonna nga uray asino pakairamanan daytoy ti adda iti sitwasyon ni Secretary Teodoro, saanna metlaeng daytoy a palampasen.
