Sumangsango ti maysa a Pinay nurse practitioner iti nagtutuon a federal charges sadiay Estadus Unidos kalpasan a naakusaran nga “utak” ti dakkel a healthcare fraud scheme.
Nabigbig daytoy a ni Marizel Yukee, residente sadiay Las Vegas.
Impaulog ti US District Court for the Southern District sadiay Texas, Houston Division ti warrant of arrest gapu iti kaso a conspiracy to commit healthcare fraud, wire fraud, healthcare fraud, conspiracy to pay and receive illegal kickbacks, ken money laundering.
Inakusaran ti federal prosecutors ni Yukee a mangpupuntiria kadagiti nataengan ken dagiti pasiente nga addan iti nakaru a sakit, gapu iti maatap a panangipaayna iti saan a kasapulan a wound treatments ken panagkiddaw iti bayad.
Sigun kadagiti prosecutors, addaan ni Yukee iti uppat a wound-care clinics idiay Texas, Nevada, California ken Hawaii.
Maatap a nagbayad daytoy iti illegal kickbacks tapno makagun-od iti patient referrals.
Malaksid iti dayta, maatap a pineke ti Pinay nurse ti rekord dagiti pasiente, agsingsingir iti saan a kasapulan a treatment ken umaw-awat iti minilmilyon a dolyar manipud iti kickback.
