Naaddaan iti gundaway ti Bombo Radyo Baguio a makasarita da ANGELI TRIXIE ALIMBA ken ANGELA TRISHA ALIMBA, tubo ti Kapangan, Benguet ken ti agkasingin a nag-graduar kas Magna Cum Laude idiay Benguet State University iti agpada a kurso a Bachelor of Science in Tourism Management.
Imbinglay da Angeli ken Angela a manipud pay ka-elementarya dagitoy, academic achiever dan agingga iti high school no sadino agsinsinnaruno laeng dagitoy.
Sigun kenni Angela, adda dagiti gundaway a daytoy ni maununa iti ranking ken adda met dagiti gundaway a ni Angeli ti adda iti rank.
Nupay kasta, impettengda a kanayonda nga agsinsinnarunno iti ranking. Kamaudiananna, ita a kolehiyoda , impeksa dagiti agkasingin a saanda a ninamnama nga agleppasda iti kinakolehiyo kas ‘Magna Cum Laude’.
Apaman a nadamag dagiti agkasingin nu saanda a kinita iti tunggal maysa kas kakompetensya nangnagruna ta agpada dagitoy iti kurso nga inala, inlawlawagda a saanda pulos a kinita ti tunggal maysa kas kakumpetensya gapu ta sigun kenni Angela, awan ti serbina nu agkinumpetensyada a dua isu’t gapunna a ti pamay-anda laengen, agsinsinuportada a dua no sadino nu adda dagiti magun-od ti maysa nga achievement, iselebrar da daytoy a dua.
Iti laksid ti pagpadaan dagiti dua, impeksada nga adda dagiti pagsinabalianda iti paglaingan. Sigun kenni Angeli, paglaingan ti Angela ti Mathematics, banag nga isu met ti pagkapsutanna.
Bayat a pagkapsutan met ni Angela ti Science and Arts, banag nga isu met ti paglaingan daytoy.
Inlawlawag metlaeng dagiti agkasingin nga uray man agpada dagitoy iti langa, wagas ti pannarita ken dadduma pay, addu dagiti banag a saanda a pagpadaan kas iti personality, interest , ken skills.
KASANO NGA AGAPA DAGITI AGKASINGIN?
Impetteng ni Angeli a normal laeng kadagiti agkakabsat ti panag-apa. Sigun kenkuana, adda met latta dagiti gundaway nga adda ti saanda a pagkinaawatan nga agkakabsat ngem impettengna a tunggal adda ti saanda a nagkinaawatan, adda latta ti panagpasensiya kadakuada nga agkakabsat.
PANANGALA ITI KAPADA A KURSO
Insalaysay dagiti agkasingin a da Angela ken Angeli a bayat iti panag-enrollda idiay Benguet State University, maysa da kadagiti naawan iti slots no sadino maysa ti BACHELOR OF SCIENCE IN TOURISM MANAGEMENT a nabati a kurso a mabalinda a pagpilian. Innayonda pay a baro a kurso ti BSTM idi nag-enroll dagitoy.
Sigun kenni Angela, pinagpanunotanda nga alaen ken ipadas ti nasao a kurso. Nupay kasta, imbinglayda nga iti likod ti panangalada iti nasao a kurso, tarigagayda idi a mangala iti Nursing. Sigun kenni Angela, nangrugi ti arapaapda babaen iti ‘Little Doctor’ , maysa a pabuya para kadagiti ubbing.
Adadda nga intuloyda ti tarigagayda babaen iti panangalada iti ‘caregiving’ iti subject da a Technology and Livelihood Education (TLE) kabayatan iti kina-high school da idiay Benguet National High School, Wangal.
Nupay kasta, dinakamatda Angela ken Angeli a nupay kayatda idi a mangala iti nursing, inkonsiderada ti pinansyal nga aspeto ken ti slots da metlaeng iti nasao nga unibersidad.
KARIT ITI PANAGADAL
Imbinglay da Angeli ken Angela nga addu dagiti napadasanda a rigat ken sinangoda a karit kabayatan iti panagadalda nangnangruna iti kinakolehiyo nangnangruna ta aggidan dagitoy nga agadal.
Insalaysay ni Angeli a nupay libre ti tuitionda iti nasao nga unibersidad, addu latta dagiti masapul a maiparuar a gatad nangnangruna idi second year ken third year no sadino adda dagiti educational tour a kasapulanda a pakipasetan.
Nupay kasta, impetteng ni Angeli nga saan a nagbalin a laped ti kinakurang ti pinansyal nga aramatenda gapu ta nagbalin a supporters da dagiti parentes da babaen iti panangipaay kadagiti amin a kasapulanda; kapamilya, ken dagiti mannursuroda a mang-en-encouraga kadakuada.
Gapu iti daytoy, inpakatda a dua ti panageskwelada ken sinimpada a nasayaat ti panagadalda a dua.
Nupay kasta, iti proseso ti panagadalda, imbinglay ni Angela nga adda met ti sinangoda a karit nu maipapan iti pinansyal.
Sigun kenni Angela, insingasingda met kadagiti parentesda a kabaelanda nga ag-part time kabayatan iti panageskwelada ngem nagkedked dagiti parentesda a palubosan ida nga agtrabaho.
Imbinglay ni Angela a kinuna dagiti parentesda kadakuada nga isudan ti bahala nu maipapan iti pinansyal la kitdi saysayaatenda ti panagadalda a dua.
Ti tatang da Angela ken Angeli a ni Mr. Santos Alimba ket maysa a Buyagan jeepney driver bayat a ti ina da a ni Mrs. Jaycelene Alimba, ket maysa met nga empleyado ti maysa a bread company.
‘THIS ACHIEVEMENT IS DEDICATED TO . . . ‘
Pinagyamanan da ANGELI TRIXIE ALIMBA ken ANGELA TRISHA ALIMBA dagiti parentes da gapu iti panagturposda ken panagleppasda a dua kas Magna Cum Laude.
Sigun kenni Angela, saan pulos nga inpakpakita dagiti nagannakda kadakuada a nabanogda a mangsupsuporta kadakuada a dua iti panagadalda. Innayonna a tumulongda pay nu dadduma kadakuada kadagiti proyektoda iti anyaman a mabalinda a maitulong kadakuada.
Iti udi na,pinagyamanda metlaeng amin a nagbalin a paset iti journey da a dua. //bombokaren.c.sapirao
