Inlaksid ti Ateneo de Manila University (ADMU) ti resulta ti imbestigasion ti pulisya mainaig iti ipupusay dagiti student-athletes Rene Baterbonia ken ti Nigerian a ni Divine Adili.
Iti resulta ti inisyal nga imbestigasion ti pulisya, rumrumuar a planado ti athletics office ti team-building activity idi June 08, 2026.
Nupay kasta, impetteng ni University spokesperson Rev. RB Hizon a kontra ti nasao nga unibersidad iti case recommendation.
Sigun kenni Hizon, nangipaay laeng ti University Athletics Office (UAO) iti transportation logistics a paturong sadiay Dipaculao, Aurora.
Maipalagip nga idi July 01, inrekomendar ti Criminal Investigation and Detection Group (CIDG) ti criminal charges kontra iti athletic director a ni Emmanuel Fernandez ken sports facility officer Vincent Raphael Mangulabnan.
Inkeddeng ti nasao nga ahensiya nga addaan metlaeng iti responsabilidad ti sports office ti ADMU iti napasamak nga insidente.
Maibasar iti naipila a supplemental referral, inrekomendarda ti pannakaipila ti “two counts of reckless imprudence resulting in homicide” kontra iti nagikkat a head coach a ni Tab Baldwin ken walo pay a kameng ti staff.
Pimmusay da Baterbonia ken Adili kalpasan a nalmesda kabayatan ti team-building activity dagitoy iti maysa a resort sadiay Dipaculao.
Naitabunen ti bangkay ni Baterbonia iti hometown na idiay Talacogon, Agusan del Sur idi June 24 bayat a naitabon met ti bangkay ni Adili iti hometown na sadiay Umueri, Nigeria idi June 26, 2026.
