Pinatgan ti International Criminal Court (ICC) ti kiddaw ti prosekusion a maipaayanda ti access kadagiti materiales ni sigud a President Rodrigo Duterte nga adda iti kustodia ti Registry.
Dagiti materiales ket kukua ti sigud a Presidente a nakompiskar kalpasan a nakemmeg ken naiturong sadiay The Hague, Netherlands.
Iti desisyon ti ICC, kinunana nga adda dagiti nainkalintegan a rason a ti panageksamin iti materials ti sigud a Presidente ket makaipaay iti ebidensia para iti imbestigasion.
Iti sabali a bangir, imbasura ti ICC ti kiddaw ti prosekusion a maipaayanda iti access kadagiti tulbek a naipaima metlaeng iti Registry.
Inkonsidera ti ICC ti argumento ti depensa a dagiti tulbek a naala kenni Duterte bayat ti pannakaibiahena sadiay The Hague ket mabalin a mangipaay ti access kadagiti sanikua wenno impormasion a kukua dagiti pamilyana.
