Imbinglay ni ni Atty. Lauro Gacayan, legal luminary ken law professor, a naibatay iti umno a basaran ti kaso a plunder a naipila kontra kenni Sen. Rodante Marcoleta seknan iti maatap a pakainaiganna iti P75 milyon a donasion kabayatan iti 2025 election.
Iti pannakiuman ti Bombo Radyo kenkuana, inlawlawagna a saan a mapalubosan dagiti opisial ti gobyerno nga umawat kadagiti dadakkel a gatad wenno sagut malaksid nu moderate gifts laeng ti maited kadakuada.
Sigun pay kenni Gacayan a napigsa ti ebidensia iti kaso gapu ta ni Marcoleta met laeng ti nangipudno a nakaawat isuna iti donasion.
Innayonna nga isu a ti panagpudnona mismo ti maysa kadagiti kangrunaan a batayan iti naipila a reklamo.
Sigun pay kenkuana, mabalin met a mairaman iti pannakausig dagiti nangited iti kuarta no mapaneknekan a naited dayta kas panangimpluwensia wenno panangkikil iti senador, nangnangruna no napasamak daytoy iti panawen ti eleksion.
Sigun pay kenkuana, ti nairehistro laeng ni Marcoleta iti Statement of Assets, Liabilities and Net Worth (SALN) ket agarup P51 milyon ket masapul a mailawlawag no sadino ti nagturongan ti dadduma pay a kuarta manipud iti naawat a P75 milyon a donasion.//BomboKhey
