Pimmusay ti walo bayat a mapukpukaw ti dua nga indibidual kalpasan ti panagreggaay ti daga idiay Malapatan, Sarangani idi Biernes ,July 10, 2026.
Sigun iti Municipal Disaster Risk Reduction and Management Office (MDRRMO) idiay Malapatan, dumanon iti 10 nga indibidual ti nagaburan gapu iti nasao a panagreggaay.
Pito kadagitoy ti dead on the spot bayat a naitaray iti ospital ti maysa ngem naideklara metlaeng a dead on arrival.
Sigun iti ahensiya, napasamak ti insidente iti 500 meters ti kaadayona manipud iti komunidad.
Dumanon iti 30 agingga 50 a household ti adda sadiay.
Iti agdama, manarimaan ti isaysayangkat dagiti response team a search and rescue operations iti ground zero sadiay Sitio Fundao, Barangay Poblacion para iti pannakabirok dagiti dua a mapukpukaw.
Maibasar iti kaudian a datos, dumanon iti agarup 115 a sangakabbalayan manipud iti dua a barangay sadiay Malapatan ti naapektaran iti agtultuloy a tudo ken flash floods.
Sumagmamano kadagiti biktima ti addan kadagiti evacuation center ken namnamaen ti MDRRMO nga agtalinaedda sadiay agingga a sumayaat ti panawen.
