Nakaselar ti biyahe dagiti 73 a Seaports iti pagilian kalpasan nga impangato ti Philippine Atmospheric, Geophysical and Astronomical Services Administration (PAGASA) ti gale warning iti northern ken eastern seaboards ti Amianan a Luzon idi Sabado, July 11, 2026.
Kagiddan metlaeng daytoy ti pannakaipaulog ti Tropical Cyclone Signal No. 2 iti amianan a paset ti Batanes (Itbayat) ken TCWS No. 1 iti sumagmamano a paset ti Batanes, Babuyan Islands, ken amianan a paset ti mainland Cagayan a kas iti Santa Ana, Gonzaga, Santa Teresita, Buguey, Camalaniugan, Aparri, Ballesteros, Abulug, Pamplona, Sanchez-Mira, Claveria, ken Santa Praxedes.
Sigun kenni OCD Deputy Administrator Assistant Secretary Bernardo Rafaelito Alejandro IV, dumanon iti 305 a pasahero ken 176 a rolling cargoes ti na-stranded agingga iti agsapa ti Sabado.
Iti sabali a bangir, naobserbaran ti sumagmamano a pannakadadael ti imprastraktura sadiay Mindanao.
Kabayatanna, kinuna ni Alejandro a 370 a local government units ti nangsuspender ti klase iti pagilian.
