Dumanunen iti 18 dagiti pimmusay gapu iti tudo ken panaglayus nga intunda ti Habagat ken Bagyo nga Inday.
Sigun kenni Aseg. Bernardo Alejandro IV, Deputy Administor ti Office of Civil Defense, kaaduan paylaeng kadagiti pimmusay ket manipud sadiay Mindanao, partikular dagiti addaan iti panagreggaay.
Nakaawat metlaeng digitoy iti impormasyon nga adda ti pimmusay sadiay Iloilo ngem mabiripikar paylaeng.
Mainaig iti dayta, dumanunen iti 69, 221 a pamilya ti naapektaran iti panagtudtudo ken layus.
Agtaltalinaed paylaeng dagiti 3,473 a pamilya wenno 11,000 nga indibidual iti evacuation centers.
Nakasagana met itan dagiti relief goods kadagiti Local Governments iti lugar.
Kabayatanna, agpalpalagip ni Alejandro kadagiti agnanaed kadagiti napeggad iti panagreggaay ken layus nga agbakwitda no kasapulan.
