Ad-adalen ti gobierno ti posible a pannakaingato ti plete ken cash aid gapu iti
pangta ti panagngato ti presio ti petrolyo nga intuntunda ti kumarkaro a tension sadiay Middle East.
Sigun kenni Palace Press Officer (PCO) Undersecretary Claire Castro, binilin ni President Ferdinand Marcos Jr. ni Department of Transportation (DOTr) Secretary Giovanni Lopez a sukimatenna ti kasasaad ken mangirekomendar iti addang a mangpabassit iti epekto ti panagngato ti presio ti lana, bayat a masalakniban dagiti consumers manipud iti nangato a gastos iti transportasion ken tagilako.
Innayonna ni Atty. Castro a kayat ti Presidente nga awan ti mabati ken kasapulan a matulongan ti amin iti umno ken balanse a wagas.
Kabayatanna, bigbigen ti gobierno ti nangato a presio ti petrolyo a mangitunda iti panagngato ti plete iti transportasion ken presio dagiti kangrunaan a tagilako.
Gapu iti dayta, impasigurado ni Castro nga agtultuloy ti tulong ken repasuen ti gobierno ti apela nga inpila ti transport group a Pasang Masda tapno maipatungpal ti P1 a provisional fare increase.
