Binmisita ni Cabinet Secretary Benjamin “Benhur” Abalos Jr. iti nakaimasayagan ti nabagsol a rider idi Biyernes ken inyebkasna ti panakipagladingitna iti pamilya ti pimmusay.
Nangipaay metlaeng daytoy iti financial assistance ken inkarina ti suporta ti gobyerno iti sibubukel a pamilya.
Impeksana metlaeng a kayat ni President Ferdinand Marcos Jr. nga iyebkas ti pannakipagriknana kadagiti pamilya.
Maipalagip a pimmusay ti nasao a rider idi parbangon ti Hulyo 14 kalpasan a binagsol daytoy ti pasahero na iti ice pick idiay Kaunlaran Village, Barangay 20, Caloocan City, ken inalana ti motor daytoy.
Naitaray pay daytoy iti pagagasan ngem pimmusay metlaeng daytoy gapu iti sugat a nasagrapna.
Impasigurado met ni Abalos iti pamilya ti biktima a magun-odda ti hustisya seknan iti napasamak a krimen.
Malaksid iti dayta, impanamnamana ti suporta iti maysa nga anak ti rider nga adaan ti kondisyon nga autism.
Mainaig iti dayta . .
Nangipaay metlaengen ti Department of Social Welfare and Development (DSWD) iti assistance para iti pamilya ti pimmusay a rider.
Naipaay ti assistance babaen iti DSWD Field Office (FO) National Capital Region (NCR) apaman a naamwanda a daytoy ket maysa a solo parent ken addaan daytoy iti anak nga addaan ti autism spectrum disorder (ASD).
Impakkaammo ti nasao nga ahensya a karaman kadagiti inpaayda a tulong ket cash assistance ken funeral assistance. //bombokaren.c.sapirao
