Kinompirmar ti Philippine Army a pimmusay ti maysa a rebelde kabayatan ti rinnupak iti nagbaetan dagiti soldado ken komunista iti kabambantayan a paset Tineg, Abra idi July 19 ken July 20, 2026.
Sigun iti pannakangiwat ti 5th Infantry Division a ni Major Ed Rarugal, ti biktima ket mapapati a miembro ti Ilocos-Cordillera Regional Committee (ICRC), wenno ti regional command of the Communist Party of the Philippines-New People’s Army nga agtigtignay iti Northern Luzon.
Narekober ti bangkay iti nakapasamakan ti insidente ken naiturong iti funeral home sadiay Abra.
Manarimaan ti panagtrabaho dagiti otoridad tapno mabigbig ti nasao rebelde bayat nga agtultuloy ti clearing operation iti nagbeddengan ti Tineg ken Lacub.
Agtaltalinaed paylaeng dagiti tropa iti nasao a lugar tapno mataginayon ti talna ken seguridad iti lugar.
Iti agdama, agtultuloy ti panangsurot dagiti puersa ti gobierno kadagiti nabati a kameng ti armado a grupo a maatap nga agtigtignay iti nasao a lugar.
Maipalagip a nagrugi ti military operation kalpasan a nasabat dagiti tropa ti gobierno dagiti armado a rebelde iti kabambantayan a paset ti Tineg.
Nagtultuloy ti rinnupak iti sumagmamano nga aldaw a nangitunda iti ipupusay ni Corporal Drexler Gumayat, maysa a soldado manipud sadiay Barangay Bangad, Tinglayan, Kalinga.
Pimmusay ni Gumayat iti pursuit operations kontra kadagiti armado a grupo kabayatan ti maikadua nga engkwento dagitoy.
